शाळेविषयी माहिती :

                      विद्यार्थ्यांची शैक्षणिक गुणवत्ता वाढविण्यासाठी शाळेतील शिक्षक सतत कटिबद्ध असतात.येथील शिक्षक उच्चविद्याविभूषित असून मुख्याध्यापक व नऊ शिक्षकांचे मुंबई येथील रामभाऊ म्हाळगी प्रबोधिनी येथे १० दिवसांचे आंतरराष्ट्रीय दर्जाचे प्रशिक्षण झालेले आहे. भारतरत्न अटल बिहारी वाजपेयी जि.प.आंतरराष्ट्रीय शाळा वाडेगांव मुले ही शाळा जिल्ह्यातील पहिली डिजीटल शाळा असून विद्यार्थ्यांना आधुनिक तंत्रज्ञानाचे ज्ञान देण्याच्या दृष्टीने शाळेतील सर्व वर्गखोल्या डिजीटल करण्यात आलेल्या आहेत.शाळेमध्ये चार प्रोजेक्टर बसविण्यात आले आहेत त्यासाठी वाय-फाय सुविधा उपलब्ध असून विद्यार्थ्यांसाठी व्हर्चुअल क्लासरुम सुद्धा उपलब्ध आहे.शाळेमध्ये कुठलाही अनुचित प्रकार घडू नये म्हणून शालेय परिसरामध्ये ठिकठिकाणी सीसीटीव्ही कॅमेरे लावलेले आहेत.

                      विद्यार्थ्यांचे मन शालेय परिसरात रमविण्याच्यादृष्टीने शालेय परिसर चाईल्ड फ्रेन्डली तसेच संपूर्ण शालेय इमारतीची रंगरंगोटी करून बोलक्या भिंती उभारण्यात आलेल्या आहेत. शालेय परिसरात शालेय परसबागनिर्मिती करण्यात आली आहे.विद्यार्थ्यांचे आरोग्य निरोगी राहावे म्हणून शाळेत जलशुद्धीकरणकेंद्र सुद्धा तयार केले आहे.किशोरवयीन मुलींसाठी ‘सॅनिटरी नॅपकीन’ वेन्डीग मशीन बसविलेले आहे.विद्यार्थ्यांच्या सर्जनशीलतेला चालना देण्यासाठी शाळेमध्ये अटल प्रयोगशाळा तयार करण्यात आलेली आहे.दैनंदिन परिपाठातर्गंत अद्ययावत साउंड सिस्टीमचा वापर करण्यात येतो. ह्याशिवाय वर्षभर विविध सहशालेय उपक्रम आणि सांस्कृतिक कला व क्रीडा महोत्सवाचे आयोजन करण्यात येते.सलग दोन वर्षांपासून शाळा तालुकास्तरीय चॅम्पियनशिल्ड मिळवत आहे.